E 15 tone le mamafa o le uta o vailaau faafomai, ma meafaigaluega e faaaogā e le auaunaga a le soifua maloloina, ua tauaao nei e le Minisita ma le pulega o le Matagaluega ma o se fesoasoani ua tauala mai i le faalapotopotoga o le soifua maloloina o le lalolagi le World Health Organization, ae sa lagolago iai ma le faalapotopotoga o taumafa a le lalolagi.

O le Iuni a Malo Europa na fesoasoani i le aumaia o lea uta tele i se vaalele na momoliina mai le fesoasoani lea na taunuu i Samoa i le Aso Gafua o lenei vaiaso. O lenei foai ua aumaia mo lo tatou atunuu e lagolago ai i galuega o feagai ma fomai ma tausi soifua ma le aufaigaluega uma o loo tautuaina galuega o puipuiga o Samoa mai le faama’i Koviti-19, aemaise lava i le taimi nei ua pepesi i le lautele o le atunuu le siama o le faama’i.  

Ua aofia i le uta na aumai puni fofoga o ituaiga e lua le surgical ma le N95 masks, faapea puni fofoga o le ituaiga o le shield mask, o totigilima e ufi malu ai aao poo lima, o ofu talaloa e ufiufi ai le tino, faapea masini e fai ai su’ega o tagata e iloa ai ua aafia pe leai i le siama o le Koviti-19.

O isi meafaigaluega e faaaogā i le ea manava o le okesene. O le a tufaina uma ia masini ma meafaigaluega i falemai uma i le atunuu faapea le falemai i Motootua ma Tuasivi. Ua faaalia ai le agaga faafetai o le Minisita o Soifua Maloloina le afioga Valasi Luapitofanua Toogamaga Tafito Selesele, i le agalelei o paaga a Samoa, le Soifua Maloloina o le Lalolagi, le Faalapotopotoga o Taumafa a le Lalolagi ma le Iuni a Europa, ona o ni uo mamae i taimi o mafatiaga o le atunuu mai le faama’i, ma o se laveai tāua lea i le aao faasoa o le Malo i le itu tau tupe.

O le Malo tele o Amerika na taunuu foi lana fesoasoani o le vailaau o le tuipuipui o le Koviti-19 le Pfizer na taunuu i le faaiuga o le vaiaso na tea nei.