I le 14 tausaga talu ona faatūina i le Iunivesite Aoao o Samoa le a’oa’oina o le tomai faafoma’i le medical profession, o se tasi lea o punāvai o le poto a’oa’oina ua mafai ai nei ona faauu nisi o alo ma fanau a le atunuu ma ulufale atu loa e galulue i le matāgaluega o le soifua mālōlōina.
E to’a 13 foma’i fou e aofia ai alii ma tamaitai ua amata nei ona galulue i le auaunaga tau soifua mālōlōina ina ua faatino a latou tautoga i luma o le Palemia ma sui o le sosaiete a foma’i a Samoa i le tauaofiaga o le fono faaletausaga lona 78 a le sosaiete na amatalia i le Aso Tofi o le vaiaso nei.
Ua faaopoopo foi le isi 10 ma ona tupu foma’i ua mae’a le lua tausaga sa galulue faamasani ai i le matāgaluega ma ua maua tusipasi ua faamautū ai le avea ma foma’i atoatoa.
I lea fono faaletausaga sa tatala aloa’ia e le Palemia le afioga Fiame Naomi Mataafa, sa faaaloalo ai foi le sosaiete i sui e to’aiva o ni foma’i ua silia i le 70 tausaga o le soifua ma o loo auauna pea.
