I faigatā ma puapuaga sa fetaia’i ma le kamupani vaalele a le atunuu le Samoa Airways i aitalafu sa togitogi, o le tolu tausaga ua savalia talu mai le tausaga e 2022 ua faamauina ai le aofa’iga tuufaatasi o polofiti poo tupe mamā sa maua ai e le kamupani vaalele e $87 miliona tālā.
O aitalafu sa iai se aofa’iga e 80 miliona tālā ua palasi maualalo nei i le na o le 10 miliona ina ua mae’a ona totogi le 70 miliona i totonu o lea tolu tausaga.
I le 12 masina faaletausaga o tupe sa faai’uina i le aso 30 o Iuni o le tausaga nei na faamauina ai se tupe mamā e tusa ma le 11 miliona tālā, mai lea aofa’iga ina ua aveesea totogi o lafoga ua maua ai se vaegātupe e tasi le miliona o le dividend poo le sao tau tupe o le Samoa Airways ua tauaao atu i le Malo mo ana galuega fai.
I le 11 miliona o tupe mamā na faamauina i le 12 masina na mae’a i le faai’uga o Iuni o le tausaga nei, o le 10 miliona o le a toe faaalu i le faaleleia o le tasi o vaalele twin otter o le kamupani vaalele, lea o le a ave i se kamupani i Kanata e faatino ai galuega ma le faamoemoe e toe aumai ia Fepuari o le tausaga fou.
Ua momoli le faamalo ma le faafetai a le Ofisa Sili o le Samoa Airways le afioga Fauo’o Tauā Fatu Tielu i le lagolago a le atunuu aemaise o paaga totino o loo faaaogāina le tautua a le kamupani vaalele auā ana lē seanoa le latou opogi ma avatu le lagolago, e lē mafai ona ausia e le kamupani vaalele i totonu o ia tausaga ni tupe mamā poo polofiti.
Ua momoli ai foi ma le faafetai a le Ofisa Sili i le komiti faafoe o le Samoa Airways i le latou galuega ua a’e manuia ai taumafaiga a le kamupani vaalele ma le faanaunauta’iga ia faaauau pea tulaga lelei tau tupe ua ausia.
O le Komiti Faatonu o le kamupani vaalele a le atunuu o le afioga Tupuola Oloialii Koki Tuala, o le ta’ita’ifono faavaitaimi, ma le afioga Taimalieutu Charlie Westerlund o le faatonu, ma le Ofisa Sili o le kamupani vaalele le afioga Fauo’o Tauā Fatu Tielu.
