O faamaumauga lata mai a le Matāgaluega o le Soifua Mālōlōina i le savalia ai o le vaiaso 34 talu ona pesia Samoa i le vairusi o le faama’i fiva o ponaivi poo le dengue fever, ua faailoa nei i ia faamaumauga le oo atu i le 10 afe 982 le aofa’iga o tagata i lo tatou atunuu na aafia i āuga o lea faama’i talu mai Ianuari o lenei tausaga.
I lea aofa’iga o le 3,379 na faamaonia mai su’esu’ega faafoa’i i le falesu’etoto.
I le va o le aso 18 ma le aso 24 o le masina nei o Aokuso e 1,307 na faamauina le aafia mai faamaumauga a falema’i faaitumalo e aofia ai le falema’i tutotonu o Tupua Tamasese Meaole i Motootua.
Ua faailoa e le soifua mālōlōina i lea lipoti lata mai ua faaitiitia i le 14 pasene le aofa’i o tagata e aafia i le fiva o ponaivi mai le vaiaso 33 o le faama’i, e 55 gasegase o loo taofia i falema’i mo togafitiga ae leai se gasegase o taofia i potu mo gasegase tigaina.
I faamaumauga lava o le vaiaso 34, o le itumalo o Anoamaa 1, e 67 tagata na aafia ma Palauli 3 e 38 i latou sa maua i āuga o le faama’i.
E to’aono ua faamauina ua maliliu i le fiva o ponaivi ma ua fautuaina ai le faaauau pea o puipuiga o le soifua manuia mai lea faama’i.
