Ua mautū nei le fesoasoani a le polokalame a le malo o Ausetalia mo auaunaga i galuega faatusitala ma faasalalauga i le Pasefika e ta’ua o le PACMAS, poo le Australia Pacific Media Assistance Scheme e faatupe ai le faagaioia o le ofisa tutotonu o galuega a le JAWS poo le asosi o tusitala ma le ‘aufaasalalau a Samoa.
O le Aso Faraile ua mavae na faamautū ai lea fesoasoani e tusa ma le fitusefulu tolu afe tālā Samoa mo le umi e 12 masina.
O se tupe o le a totogi ai le tagata o le a vaaia le ofisa ma gafa foi ma isi galuega tau fesoota’iga, aemaise o le faatinoina o galuega a le asosi e mana’omia ai lea auaunaga, ae o le a faatau ai ma se masini komepiuta ma meafale mo le ofisa.
O se faafitauli e feagai pea i tausaga uma ma le asosi o le gaogao i’i o lana faasoa tau tupe e faagaioia ai se ofisa, ae o le feagaiga ua osia nei ma le PACMAS a Ausetalia o le a lagolago ai le faagaioia o ana galuega mo lona ofisa tutotonu.
E ese mai le 73 afe le tasi o fesoasoani mai lea lava polokalame a Ausetalia o se vaegatupe e tusa ma le 32 afe 500 tala o le a totogi ai le lisi o le nofoaga ua iai le ofisa o le asosi, ma le aofa’iga atoa o le lagolago a lea fesoasoani mo le asosi a tusitala ma le ‘aufaasalalau a Samoa e $105,000 tālā.
O le Pelesetene ma le Sui Pelesetene o le JAWS faatasi ai ma le sui o polokalame fesoasoani a le PACMAS i Samoa sa sainia i le faai’uga o le vaiaso le faamautūina o lea fesoasoani, o loo fuafua e faaauau mo le 3 tausaga.
