O le afio’aga o Afega i le itumalo faapalota o Sagaga 2 o le ulua’i sui tauva lea ua momoli aloa’ia atu i le vaega faaupufai o le Samoa Ua Potopoto, ma o le a toe finau ai le tofa Maulolo Tavita Amosa i le nofoa o le itumalo sa seei ai i le paea’iga 17 a le Palemene a o lagolago i le pati faaupufai e puipuia aiā tatau a tagata.
O faasalalauga i fesoota’iga faaonaponei a lea vaega faaupufai sa molimauina ai lea faamoemoe i le taeao o le Aso Gafua e pei ona sa auai le paia maualuga o Aiga Sa Gauifaleai, le susū o Fata ma Maulolo, tainane le vagana i tulafale ma Tuisamau.
O le tofa Maulolo Tavita Amosa sa maua ai le numela e 36 o nofoa o le paea’iga 17 a le Palemene na ausia ai le lua vaetolu na mafai ona pasia ai teuteuga o le faavae 2025, lea ua toe faafoi ai galuega ma le pulega o le faamasinoga i le tulaga sa iai muamua.
O le faaaloalo a le afio’aga o Afega i le momoliga o le sui tauva na latou tauaao ai le meaalofa tupe e sefulu afe tala mo le vaega faaupufai o le Samoa Ua Potopoto, faapea foi le faaaloalo sa tuuina atu i le ta’ita’i o le pati le afioga i le Sa’ofaapito, afioga Fiame Naomi Mataafa.
O le faai’uga o le vaiaso ua mavae ma le amataga o lenei vaiaso sa momoli atu ai foi nisi o sui faatutū o vaega faaupufai e puipuia aiā tatau a tagata ma le Faatuatua i le Atua Samoa ua Tasi, ma o nisi o ia sui faatutū o i latou sa tauaveina nofoa o itumalo o le a toe tauva ai.
