Ua pu’e ma taofia e leoleo se tama tane e 46 tausaga le matua mo su’esu’ega i ni pauta faasāina o le ‘aisa poo le meth na maua i se uta o taga araisa sa aumai mai Amerika.
Ua faailoa ai le faafetai o le Minisita o le malo tausi mo le matāgaluega o tiute ma tupe maua le afioga Tuala Tevaga Iosefo Ponifasio i le ‘aufaigaluega a le tiute i le maua ai o ia pauta faasāina, o se galuega e tāua mo le malupuipuia o tuaoi o Samoa.
I lea finagalo o le Minisita i le nusipepa o le Samoa Observer sa ia faailoa ai sa iai le manatu o i latou na taulamua i le aumaia o ia pauta faasāina o le a avea le palota a le atunuu e fai ma auala e lē maua ai e le ‘aufaigaluega a latou gaioiga solitulafono.
O loo fuafua e tasi tesimale 8 miliona le tau o le ‘aisa na maua lea e tusa lona mamafa ma le 1,835 kalama.
E fā taga araisa e pei ona lipotia ai, sa fafao mai ai i totonu ni afifi o lea pauta faasāina.
