O Katinale Robert Prevost mai Chicago i Amerika lea ua filifilia e avea ma Pope o le Ekalesia Katoliko ina ua mautū iai le faai’uga a Katinale e 133 na faatasia i le Vatikano mo le sa’ilia o le isi ta’ita’i fou o le ekalesia.
O Pope Leo XIV e pei ona o le a silafia ai, ua ta’ua i lipoti o le ulua’i Pope lea ua filifilia mai i Amerika.
E 69 tausaga o lona soifua ma ua ta’ua e le CNN o le tele o lona taimi sa galue ai faamisionare i Amerika i Saute ma o se sitiseni o Amerika ma Peru.
Talu ai nei sa galue ai i le ofisa o le Vatikano ma ua feta’ua’ina e lē taumate o le a ia faaauau fetuuna’iga sa faia e Pope Falanisisi.
Ua tau fai faaoo ane le faamālō mai ta’ita’i o le lalolagi ia Pope Leo ma le faanaunauga o le a galulue faatasi ma le Tupusā i matāupu o loo aofia ai le lalolagi.
Ua lipotia foi se faamatalaga mai le Peresetene o Amerika, Donald Trump e faapea o se faaaloalo maualuga mo le atunuu le filifilia o Pope Leo.
Puna o Faamatalaga: https://edition.cnn.com/world/live-news/new-pope-conclave-day-two-05-08-25
