O le Aso Lulu ma le Aso Tofi na usuia ai le fono a le faalapotopotoga a le FAGASA lea e ta’i tausaga ma faataunuuina.
O le Aso Lulu o le aso muamua o le fonotaga na tatala i le sauniga lotu na saunia e le susuga i le faafeagaiga ia Rev Ata Milo mai le EFKS i Otahuhu ona sosoo ai lea ma le ‘ava o le feiloaiga.
O le saunoaga faapitoa o le aso o le faatamā a le FAGASA le Konesula Aoao o Samoa i Aukilani, le afioga ia Afemata Palusalue Faapo ll e tatala aloaia ai le usuia o le Fonotele a le FAGASA i lenei tausaga ma faamanatu ai le 30 tausaga talu ona usuia le fonotele.
O le saunoaga aami o lea aso o le afioga ia Tofilau Dr Silva Gaugatao i lana ulutala: Ole su’iga o le faasolo a le faiaoga i Aotearoa faatasi ai ma le tatala aloaiaina o le upega tafailagi a le FAGASA.
Na maua le avanoa e faasoa ai le aoga a Mangere East i a’oa’oga o loo faapea ona latou faia i totonu o le latou foi laumua.
O le galulue faatasi o mātua, faiaoga ma fanau auā lava le lelei o alo ma fanau.
O le folasaga a le SAASIA i le faatāua lava o le gagana, ma a’oa’oga o loo faia e Aoga Amata, ona sosoo ai lea ma le fono a le AGM a le FAGASA.
Na taualuga polokalame o le aso muamua i faafiafiaga a aoga taitasi e amata mai lava i Dunedin seia oo mai i Aukilani.
O le aso lona lua na tatala foi i le sauniga lotu na saunia e le susuga ia Maaola Seseroma, ona sosoo ai lea ma le saunoaga aami mai ia
Dr Sala Faasaulala i lana ulutala e faapea, O fenu ma ma’a tatao o aupega e tautua ai le alofa. O aoga na fai a latou folasaga e tova ai tautalaga aami, o le aoga a Finlayson Primary School.
O le tofa manino ma lona tāua i le galuega faafaiaoga, ina ia mafai ona olaina e faiaoga, matua, ekalesia, nuu ma fanau, ona sosoo ai lea ma le aoga a Rosebank School i le latou autu, O le gagana faifai pea – E opogi le gagana e faifai pea (repetition) auā o se maatulimau lea e fesoasoani i le gagana a fanau.
Auā o le faifai pea e faamanatu, manatua, tapu’e, ma e fesoasoani i le a’oa’oina o le gagana a fanau ina ia faamanuiaina.
O le isi saunoaga aami o le susuga ia Dr Martha Aseta i lana faasoa i le tāua o le malosiaga o le gagana muamua e lagolago i le toe faaolaolaina o le gagana a fanau i Aotearoa nei.
O le tausaga na te’a nei na o le 80 sui na auai a le FAGASA ae o le tausaga nei o lea ua 70 sui fou, e aofia ai ma faiaoga lagolago poo Teacher aides, ma ua 150 le aofaiga o sui aloaia lea ua auai.
O le auga o aute o lenei fonotaga i lenei tausaga, o le mafutaga e fesootai, mafuta ma faasoa ai faiaoga, o Aoga Amata o ē o loo a’oa’oina le gagana Samoa i totonu o Aotearoa nei.
O faiaoga e omai mai Dunedin, Kalaiesetete, Ueligitone ma Aukilani.
O le mafutaga e tufa ai faatufugaga, tofa manino, ma le tofa tatala a le aufaitōfa ua iloga i totonu o Niu Sila.
O lenei mafutaga, o a’oa’oga faafouina a faiaoga Samoa, o ē o loo faiaoga i Aoga Amata, Primary School, Intermediate seia oo lava lava i Kolisi maualuluga.
O le faatāuaina lava o le tatou gagana.
O le tāua o le gagana, ona o le tatou measina, o le tatou tofi lea mai le Atua.
O faatufugaga, a le aufai tofa, e lalaga, fenu, ma maa e tatao ai galuega a faiaoga, ma toe iloilo ai vaega o loo faapea ona lape ai le auaunaga a faiaoga.
O se fonotaga na auai sui mai le ofisa o Aoga i Ueligitone i le Taitaifono (Director Saasia) Irene Paleai-Foroti, sui Peresetene o le SAASIA ia Sofaea Penn o le susuga i le Puleaoga o le Aoga Amata Seugagogo i Otahuhu, sa faapea ona auai Puleaoga, sui puleaoga, suipule lagolago, ta’ita’i o iunite o aoga ma le mamalu o sui e 150 o Aoga e 30.
Ae o le maualuga o lenei faamoemoe ona sa faatasi mai ai sui mai le soifua maloloina mai Kalaiesetete faapea sui mai le Iunivesite o Otago ma faiaoga ua penisiona, ma faiaoga o loo aooga i Iunivesite.
