O le komisi e pulea tagata faigaluega a le Malo o se tasi o itutino tāua ua ave iai le faatuatuaga na te faagaioi le faiga faavae muamua a le Malo ua mae’a tusia ma faapepa, i le faamoemoe e taofia ai ma tafiesea soo se faiga faaalatua poo le corruption, i totonu o pulega a le Malo.
O le faalauiloaina o le faiga faavae na saunoa ai le ta’ita’i o le Malo le tamaitai Palemia o ia foi o le Minisita o loo iai le vaaia o le Komisi e pulea tagata faigaluega a le Malo, i le tāua o pulega lelei e faavae i le lē faaitu’au ae tutusa tagata uma.
Na ia apo foi ma ave le faafetai i le faafeagaiga na amataina le sauniga o le faalauiloa o le faiga faavae, i se upu faaleagaga ona sa ia tuusa’o le feau e talafeagai ma le autu, o faiga faaalatua o se agasala.
Le ta’ita’i o le Malo i le tamaitai Palemia, o le minisita foi o le komisi e pulea tagata faigaluega a le Malo, afioga Fiame Dr Naomi Mataafa.
O faauluuluga o auaunaga eseese a le Malo, faapea le sui o le UNDP na auai i le faalauiloaina o le uluai faiga faavae ua tapena e le Malo mo le tafiesea o faiga faaalatua.
O se tasi o fuafuaga o loo i luma nei o tapenaga e fesootai i le faiga faavae ua mae’a tusia, o le fausia lea o se tulafono e puipuia’i tagata e latou te faailoa ni faiga faaalatua poo whistle blower i totonu o le Malo.
