Ua alafai mai le atunuu i se tala faanoanoa i le tuumalo filemu ai o lana afioga le Tupu o Maori, Kiingi Tuheitia Pootatau Te Wherowhero VII, i le 69 o tausaga o lona soifua, a o iai faatasi ma si ona faletua Makau Ariki ma le nofoaalo, Whatumoana, Korotangi, ma Ngawai Hono I Te Po.
E tuumalo nei Kiingi Tuheitia i le faai’uga o le masina, ae na o ni nai aso ua tuana’i atu sa faamanatuina ai le lona 18 o tausaga talu ona seei i lona tofiga o le Tupu poo le Faaao o Maori i totonu o Aotearoa.
O se aso faamanatu tāua na auai atu ai mo le ululai taimi se aumalaga tele a tagata Pasefika aemaise Samoa, e tali i le valaaulia mai lana afioga ina ia auai faatasi i le faamanatuina o lenei aso tāua i lana afioga ma tagata Maori uma.
O le a toe tuuina atu se lipoti mulimuli mai o ni tapenaga uma o le tuumalo o le afioga i le Tupu, ae o se avanoa e momoli ai faamaisega i le faletua ma le nofoaalo aemaise tangata Whenua uma i Aotearoa nei, a o ufitia ai i le ao pogisa i le tuumalo o lo latou Tupu.
