Ua alafa’i mai lo tatou atunuu i lenei aso fou aemaise le tapuaiga a le Ekalesia Katoliko aoao i le puleaga a Samoa-Apia i le tala faavauvau, i le tuumalo o le Taitai o le Ekalesia Katoliko i Samoa, le afioga i le Akiepikopō Alapati Lui Mataeliga.
Ua faailoa i se faasilasilaga i upega tafailagi o le 3 i le vaveao o le Aso Lua, 25 o Aperila 2023, na valaau ai le Matai Sili i lana afioga a o iai i Niu Sila.
Ua 21 tausaga o tauave e le afioga Alapati Lui Mataeliga le tofiga Akiepikopō e tusa o faamaumauga, ma na tofia o ia e le pulega o le ekalesia aoao i le lalolagi le Vatikano lea e i Roma ia Novema o le tausaga e 2002 e avea ma Akiepikopō lona lua mo Samoa ina ua malolo manumalo le uluai Akiepikopō mo le Ekalesia Katoliko i Samoa, le afioga Katinale Pio Taofinuu.
O le tausaga e 1977 na faauu ai i le tofiga ositaulaga ma avea ai ma se tasi o Patele poo faifeau o le ekalesia i lo tatou atunuu.
Na soifua mai o ia i le afioaga o Sataua i Savaii i le tausaga 1953, ma e tuumalo le afioga i le Akiepikopō ua 70 tausaga o lona soifua.
O faamaisega ma faamafanafanaga mai le puleaga Samoa-Pago Pago mo le puleaga faa-Akiepikopō Samoa-Apia ona o le tuua o le Malo e le taitai o le Ekalesia Katoliko i Samoa.
