O se ofisa sinia o le Komisi o Tagata Faigaluega a le Malo o Samoa le faletua le afioga Fuimapoao Beth Onesemo o loo ta’ita’ia le usugafono a Samoa i le faatasiga o se koneferenisi o loo faia i Canberra i Ausetalia o loo autū i se fetufaa’iga ma talanoaga i le tāua o le taofia o faiga fa’aālatua i totonu o soo se auaunaga a le malo faapea i le vaega tumaoti.
O sui o le usugafono a le atunuu o loo aofia ai le sui o le Ofisa o le Komesina o Faiga Palota, Ofisa o le Fono Aoao Faitulafono, o le Ofisa o le Su’etusi Sili a le Malo, ma le faamalu o Faalapotopotoga Tumaoti i Samoa le SUNGO.
I se faamatalaga faalaua’itele i luga o upega tafā’ilagi a le Komisi o Tagata Faigaluega a le Malo o loo faailoa ai le tāua o le faasoa ane a le Komisi a le Malo o Ausetalia o loo mata’itūina faiga fa’aālatua ma le sao foi o le usugafono a Samoa ua fausia ai nisi tapenaga mo le saga faaleleia o gaioiga ma auala e tali atu ai i le taofia o faiga fa’aālatua.
Mo le silafia, o se tausaga e le’i mamao atu na fa’alauiloa ai e le Komisi o Tagata Faigaluega a lo tatou malo a latou ta’iala ua mae’a tu’u fa’atasi faatatau lava i lea tulaga, ma ua avea ma tapenaga e lima ta’ita’iina ai le Komisi i ana galuega fai.
Sa fesoasoani le polokalame o le Tautai, e autū i le faatupuina o le tamaoaiga o Samoa ma le UNDP i le auai atu o le usugafono a Samoa i lea faatasiga.
