O le palota tele a le atunuu i le tausaga e 1996 na ulua’i avea ai le tōfā, Tolofuaivalelei Falemoe Leiataua ma sui faipule o le Palemene mo le nofoa o lona itumalo o A’ana Alofi 2, ae o le paea’iga lona 15 a le Palemene mai le tausaga e 2011 i le 2016 na muta ai lona tofi faipule o Aana Alofi 2 sa avea ai ma Fofoga Fetalai.
O le aso Tofi na salalau ai i upega tafā’ilagi tala faanoanoa ma faavauvau, aemaise o alofaaga mo lea tamāli’i ina ua faamanavaina e le Matai Sili ana galuega i le malaga a le maliu ma le oti.
O le tu’umālō o lea ta’ita’i o le atunuu e manatua ai lona sao tāua i upufai o le malo, aemaise o taimi sa avea ai ma Fofoga Fetalai ma avea foi ma Minisita o le Kapeneta. O le taimi o avea o ia ma Minisita o le Matagaluega o Tinā ma Tama’ita’i ma Agafesootai na mae’a ai ma faalauiloa le ulua’i tusi fa’alupega a le malo lea o loo fa’aaoga e le atunu’u i le taimi nei, ma o se ulua’i tusi fa’alupega foi lea ua maopoopo uma iai fa’alupega o nu’u ma afioaga o Samoa atoa.
E lei faamautūina aso o ona toe sauniga ae tu’ua nei le malo e lē sa avea ma faipule o Aana alofi numera 2 ua 76 tausaga o lona soifua.
