O le afioga Galumalemana Namulau’ulu Netina Schmidt, o se tasi o tinā o se Toe Ulutaia o Samoa sa faafaileleina le olaga a’oa’oina o fanau a le atunuu i le tele o tausaga i le tomai faafaia’oga, a o avea ma Pule o le Kolisi Faafaia’oga, ma galue foi o se faia’oga i le Kolisi o Samoa.
Sa avea ma Lesitala o le Faamasinoga o Fanua ma Suafa ma faauluulu iai lea auaunaga a le malo i tausaga ua mavae.
O se tasi o tinā sa tauaao iai le faaaloalo maualuga a le Malo ona o lana tautua matavela e ala i se faailoga taualoa.
Ua tuumalo le afioga Galumalemana Netina Schmidt i le 92 o tausaga o lona soifua, ma o le Aso Faraile, aso 25 Aperila 2025 i Samoa na faia ai ona toe sauniga.
O le tasi o faaaloalo maualuga a le malo e faatāua ai le tautua ma le sao o lea tina o Samoa, o le ufiina o lona Sa poo le pusamaliu i le fu’a poo le tagavai o le Malo o Samoa, ma tauave e le vasega o Malu o le Malo lona Sa i ona sauniga faai’u se’ia oo i le tuugamau.
O le ta’ita’i o le Malo le afioga i le tamaitai Palemia, afioga Fiame Naomi Mataafa na faia le molimau a le Malo i le sauniga i le malumalu o le Ekalesia Agelikana i Leififi.
