O le toalualauga o le faamasinoga na fuafua o le vaiaso na tea nei i sui e to’a 8 a le vaega faaupufai e Puipuia Aiā Tatau o Tagata e to’a 8 faatasi ma nisi ua molia i le lē usitaia o le faaiuga a le faamasinoga (Contempt of court) lea ua tuu atu nei tua i le masina o Novema.
O lenei mataupu o loo nafa ma le Faamasino e to’atasi i Samoa ma faamasino e to’alua mai Niu Sila ma na tolopo mai le masina o Setema e faamoemoe e toe valaau i le masina nei i lona Aso 15 peitai o lea ua toe tuu atu i tua ona o nisi o galuega o loo galulue ai Faamasino ae le’i oo i le vaiaso mulimuli o Novema.
Taua e le tamaitai Loia o loo tulai mo le FAST na aveese mai le mataupu mai le lisi o le vaiaso na tea nei ma na faailoa atu e Faamasino i Loia o itu e lua mafuaaga o le toe tuu atu ai i tua o Lea faamasinoga. O le tolaulauga muamua ia Setema sa tapunia mai lenei mataupu Mao Ofisa faasalalau.
O i latou a o loo tuuaia e le FAST i le solia o tulafono ma iuga a le faamasinoga faapea foi le lē faaaloalo i le tutoatasi o le faamasinoga e aofia ai Tuilaepa Lupesoliai Sailele Malielegaoi lea o loo molia i le faia o ni lafoga e masalomia ai lona taumaualaloina o le faamasinoga.
O lē sa avea ma Fofoga Fetalai Leaupepe Toleafoa Faafisi o loo tuuaia i lona faia o se faaiuga e faaleaogaina le tauaofiaaga o le Palemene i le Aso 24 o Me.
O lē sa avea ma Failatusi o le Fono Aoao Faitulafono Tiatia Graeme Tualaulelei o loo tuuaia i le lē usitaia o le faaiuga a le faamasinoga ma i’u ai ina loka faitotoa o le Palemene i le aso sa tatau ona fai ai le faatautoga. O Savalenoa Mareva Betham Annandale o lē sa avea ma Loia Sili a le Mālō ua tuuaia i lona taufaaleaga o le faamasinoga.
O le isi toafa e aofia ai le sui taitai o le HRPP Lauofo Pierre Meredith, o le failautusi a le patī Lealaileapule Rimoni Aiafi, o le tamaitai Loia Maiava Visekota Peteru faatasi ai ma le sui faasalalau sinia a le TV1 Sioeli Alofaifo lea ua tuuaia i le faia o ni faasalalauga i luga o televise ma upega tafailagi.
O loo tumau le finau a le HRPP ma tetee i tuuaiga a le FAST o loo faia faasaga iai latou ma faapea o faasalalauga ma polokalame o loo faaoga ai le aiā tatau o le tagata e faaali ai ona manatu (freedom of speech and expression)
