Ua toe tolopo le mataupu faasaga ia Talalelei Pauga i le vaiaso fou seia faamautu mai moliaga a le itu a leoleo.

O le talosaga a le itu a leoleo ina ia tuuina atu se lua vaiaso e faamautu ai moliaga peitai na teena e le Alii Faamasino ia Fepulea’i Ameperosa Roma lea talosaga.

Na saunoa le alii faamasino ua leva ona tatau i le itu a leoleo ona silafia le faila o le mataupu lenei o lea ua tolu tausaga o faatali, ua tuuina atu ai nei le tasi le vaiaso e faamautu ai moliaga a leoleo.

Na tuu fofoga atu foi le talosaga a le loia a Talalelei Pauga i se avanoa e tatala ai i tua ona e iai ona aafiaga faalesoifua maloloina.

Ua tuuina atu foi iai e le Alii Faamasino le avanoa lea ua toe tolopo ai e tuuina mai ai foi ma le talosaga tusitusia o le ono tatala ai i tua o Pauga pe leai foi.

O le Aso Faraile o le vaiaso na mavae nei lea na faafoi mai ai Talalelei Pauga e tali i ona moliaga o le taupulepule e tagatavaleina lē sa avea ma Palemia o Samoa i tausaga ua mavae le Susuga ia Tuilaepa Sailele Malielegaoi.

O loo tuli ai nei faasalaga o nisi sa auaufaatasi ma Pauga ae o loo taofia ai nei i le Vaaiga a leoleo Talalelei Pauga seia mae’a iloiloga a le Faamasinoga i lona moliaga.