Ua sefululima tausaga e lei toe auai i le sailiga o se Tausala o Samoa lea e masani ona faia i le taimi o le Teuila ia Setema, se Tausala o Samoa mai le Iunaite Setete o Amerika.
O le tauvaga o le tausaga nei o le a toe auai le Tausala Samoa mai Amerika.
O lea ua toe sauni malaga i Meleke sui o le komiti o loo tapenaina lea tausala, ina ua mae’a ona feiloai atu i le pulega o le Onomea Production ua faatautaia nei le tauvaga e saili ai se tausala o le atunuu, faapea le Pulega o Tagata Tafafao mai Fafo, sa faatalanoa ai le faamoemoe e toe auai se Tausala Samoa e fai ma sui o le mamalu o le atunuu o loo aumau ma nonofo i Amerika.
Na maua se feiloaiga ma sui o lea komiti ma tāpā so latou finagalo e faailoa ai le toe tapena mai o se alo tamaitai o Samoa na ola ma soifua a’e i le Iunaite Setete o Amerika e auai i le tauvaga o se Tausala Samoa.
O le talanoaga ma sui o le komiti o le Tausala Samoa USA le faletua o Roleni Peterson Tafi, o Tofuola Alofipo, ma Seiuli Malia Efferding.
O le masina o Aokuso o le a faia ai le tauvaga e saili ai se Tausala Samoa o Amerika mo le auai i le tauvaga e saili ai se Tausala o Samoa.
