O le taeao nei na te’a ai tua mai le maota gasegase o Tupua Tamasese Meaole le taitai o le Ituagai ina ua maea togafitiga na taofia ai o ia i le vaiaso na te’a nei i le Aso Tofi.
Na te’a i tua i le Aso Faraile ae o le faamatalaga mai i le afiafi ananafi a se tausi soifua e galue i lea vaega o le maota gasegase ma faailoa mai ai sa iai pea le susuga Tuilaepa Lupesoliai Sailele Malielegaoi i le falemai i le aso ananafi.
E le’i manuia sailiga o se faamatalaga mai se fomai i ona auga tonu na mafua ai ona taofia mo togafitiga ae na maua se fesootaiga ma se tasi o faipule o le vaega faaupufai ma ia faailoa mai ai na te’a i tua i le Aso Faraile ae na toe taofia i le po o le Aso Toanai. O auga o le flu ma le fiva na mafua ai ona taofia Tuilaepa e pei ona faailoa ai e le Failautusi o le Vaega Faaupufai le tōfā Lealailepule Rimoni Aiafi i le niusipepa a le Samoa Observer i le faaiuga o le vaiaso.
E le’i taloina mai tusitala mo se faamatalaga mai le vaega faaupufai a le HRPP e tusa ai o le aafia o le latou taitai i gasegase o le tino e pei ona taofia ai i le maota gasegase.
Na faailoa e se molimau faatuatuaina o se faipule o lea faafaletui o le Aso Lua ma te’a nei na lāgā ai i se feiloaiga a sui faipule o le patī le mataupu i le tofi taitai ma le tatau ona faaseetuagalu o le sui faipule o Lepā mai le taitaiga o le vaega faaupufai. Faaalia e le molimau ua toe taatia le mataupu lenei sei toe soalaupule i le fono lata mai a le faafaletui ona e to’aono faipule e le’i auai atu.
