E to’alua sui Pasefika, ua aloa’ia ona folafolaina o nisi o sui filifilia i le Komiti Faafoe o le Lakapi a Niu Sila.

O le taule’ale’a logologoā muamua o le All Blacks, Keven Mealamu ma le tamaitai ta’ita’ifono o se fono tuma’oti o Careen Rangi. 

O le vaiaso nei sa folafolaina ai e le Lakapi a Niu Sila lea filifiliga e pei ona faaalia ai e le vaega o tala a le PMN. 

Sa faamaonia ai e le Laulau o Filifiliga ma Totogi – Appoinments and Remuneration Panel – a le Lakapi a Niu Sila le filifiliga o sui e to’aiva mo le Komiti Faafoe. 

O i latou ua filifilia e aofia ai Catherine Savage, David Kirk, Doug Jones, Grant Jarrold, Greg Barclay, Julie Raue, Rowena Davenport ma Rangi – o se tausitusi mai le Atu Kuki – ma Mealamu o Samoa. 

E tusa ma se faamatalaga a le Lakapi a Niu Sila, o nei filifiliga ua tatau nei ona faamaonia e sui palota, o le 26 lea o Komiti Faatonu o iuni lakapi faaitumalo ma le Lakapi a Maori. 

O le palota mo le faamaoniaina o lea filifiliga e tapuni i le aso 17 o le masina nei o Tesema. 

Na faaalia e le Lakapi a Niu Sila, o filifiliga ta’itasi e moomia le mafuli iai o palota mai sui palota ina ia aloa’ia ai le faamaoniaina, i le tasi le palota e faaagaga mo le sui auai e tasi. 

O le tamaitai ta’ita’ifono o le laulau, Rachel Taulelei sa ia faaalia ai, sa matua’i au’ili’iliina e le Laulau o Filifiliga ma Totogi a le Lakapi a Niu Sila nei sui tauva.

Sa faama’oti ai e Taulelei, le iloiloga sa faia ma le faaeteete pe a fua atu i le fefiloi o tomai, le malamalama, ma isi sao tāua, o nei sui tauva i le taula’i e tuufaatasia le agavaa o le Komiti Faafoe mo faatinoga aogā, a o fetaia’i le ‘au ma faigata o le lakapi i le taimi nei i Niu Sila.