O le faaauau ai pea o se feeseeseaiga i le afioga o Matautu Falelatai ua taofia ma molia ai nei ni taulele’a se toalima i le faaleagaina o paipa mo le suavai a se tasi o aiga i lea lava afioaga.
Faailoa e le Sui Komesina o Leoleo Auapaau Logoitino Filipo o taulele’a e toalima ua molia nei i moliaga o le faalegaaina o meatotino o se mataupu o le a tolaulau i luma o le faamasinoga faaitumalo.
O le masina na tea nei na ripotia ai tali atu o malu o le malo i ni feeseeseaiga i totonu o le afioaga mafua mai ona o se faaiuga a le i le faia ai o se Ekalesia fou i totonu o le nuu. O lē sa avea ma Faamasino o le faamasinoga o fanua ma suafa o se matai taua foi o le afioaga Anae Misa Pita, na iai lona manaoga e faatu se lālā o le Lotu Aso Fitu i totonu o le afioaga mo i latou ua liu lotu peitai e le’i talia e pulega a alii ma faipule o Matautu Falelatai.
Faamaonia e leoleo o lea lava feeseeseaiga na i’u ai ina vaelua le nuu i ni Pulega eseese e lua, o le vaega autu poo le main village ua faaigoa o “Nuu Tele” lea o loo pulea e alii ma faipule ae o le isi vaega lea e leo auai i le manatu a le nuu Ua faaigoaina o le “faiga Nuu lona lua” ma o loo vaaia e Anae Misa Pita.
Taua foi e le Sui Komesina o i latou uma e toalima ua taofia ma molia e mai i Nuu Tele lea o loo masalomia lo latou faaleagaina uma o paipa a se tasi o aiga o le Faiganuu lona lua ma Leai ai se suavai.
O le masina nei o le a tulai ai i latou ia e toalima i le faamasinoga faaitumalo e tali i o latou moliaga.
