O le itumalo o Vaa o Fonoti o sailiiliga i ni tausaga o se paeaiga a le palemene na tofia ai sona sui faipule i le kapeneta, ua maua ai o le tausaga e 1976 sa filifilia ai le afioga Ulualofaiga Talamaivao Niko a o tula’i o se tasi o Minisita o le Kapeneta a le tofa Tupuola Efi sa tauaveina le tofi Palemia.

A fua atu iai i le umi e le’i toe pale se tofi faipule o lea itumalo i tofiga o minisita o le Kapeneta ua 49 tausaga.

O le toe filifilia o minisita e to’afā mo le Kapeneta a le tamaitai Palemia le afioga Fiame Dr Naomi Mataafa ua pale ai le tofi faipule o Vaa o Fonoti le tofa Mau’u Siaosi Puepuemai  i le tofi Minisita mo le Matagaluega o Fesoota’iga ma Faamatalaga Faatekonolosi.

O se finagalo o le minisita ina ua mae’a le faatautoga i le Aso Lulu.

Le afioga i le Minisita o le Matagaluega o Fesoota’iga ma Faamatalaga Faatekonolosi le tofa Mau’u Siaosi Puepuemai. 

O le itumalo o Aleipata Itupa i Lalo na avea lo latou sui faipule sa iai i le tausaga e 1985 le afioga Tafua Kalolo Tafua ma Minisita o le Kapeneta.

Mai lena taimi e oo mai i le paeaiga talu ai a le Palemene e le’i pale sona sui faipule i tofi Minisita o le Kapeneta.

O le savalia ai nei o le 4 tausaga o le paeaiga lona 17 a le Palemene ua toe filifilia ai sona faipule i ia tofiga e pei ona pale atu iai le afioga Faleomavaega Titimaea Tafua, ua avea ma Minisita o le Matagaluega o Alamanuia, Pisinisi ma Leipa.

O lona tuaa tamā le afioga Tafua Kalolo sa avea ma Minisita o le Kapeneta i le tausaga e 1985, ma o le 40 lenei o tausaga faato’ā toe pale le tofi o lea itumalo i le tofiga minisita. 

Le afioga Faleomavaega Titimaea Tafua o le Minisita o le Minisita o le Matagaluega o Alamanuia, Pisinisi ma Leipa.

Sa ia tauave le tofi ta’ita’ifono o le komiti o tupe a le Palemene a o le’i filifilia i le tofi Minisita o le Kapeneta.

O le itumalo o Vaisigano Numera Tasi, sa seei lo latou tofi faipule o le paeaiga lona 16 a le Palemene i le tofi Minisita o Faato’aga ma Faigafaiva, ae ua toe tusi aao iai le faigamalo o iai nei i lo latou sui faipule le afioga Niuava Eti Malolo e tauaveina le tofi Minisita mo le Matagaluega lava o Faato’aga ma Faigafaiva.

O le itumalo Palauli 3 lea o loo tula’i mai ai le tofa Lagaaia Ti’aituau Tufuga ua 70 tausaga o lona soifua ma ua avea ma Minisita o le Matagaluega o Tina ma Tamaitai Atina’e o Afioaga ma Agafesoota’i.

O le tausaga e 2001 na gata ai ona filifilia se tofi o lea itumalo i tofiga Minisita o le Kapeneta lea sa tula’i ai le afioga Leituala Tone Tuuaga.

Ua 24 tausaga ae o lea faato’ā toe ulufale i le Kapeneta se sui faipule o Palauli 3.

O le Aso Lulu o le vaiaso nei na faatauto ai Minisita e to’afā fou o le Kapeneta, ina ua faamuta e le Palemia tofiga Minisita o faipule o itumalo palota o Falealili 1, Palauli 2, Palauli 1, ma Gagaifomauga 3.

O minisita fou ua mae’a faatauto e to’alua mai itumalo i Upolu, to’alua ma itumalo i Savaii.

O faipule ua faamuta o latou tofiga minisita e tolu mai Savaii ae to’atasi mai Upolu.