Ua teena e Aumau Hunt moliaga e 8 a leoleo o loo faatulaʻi atu faasaga ia te ia.
O le tali a Aumau sa tuuina atu i le taeao nei e tauala atu i lana loia le afioga Unasa Iuni Sapolu i luma o le Tamaitai Faamasino o Talasa Saaga i le Faamasinoga Faaitumalo i Mulinuu.
O moliaga e valu a leoleo e afua mai ina ua faaulu e le Kamupani Vaalele o le Samoa Airways le tagi i leoleo ona o tuua’iga a Hunt e ala i ana faasalalauga i le Social Media.
O ia faasalalauga o loo ta’ua ai e faapea na aumai se pusamaliu i luga o se vaalele a le Samoa Airways e leai se tino maliu ae ua faatumu mai i fualaau faasāina.
I le faamasinoga i le taeao nei na faailoa atu ai e le loia a Hunt e le’i tuuina atu e le Matagaluega o Leoleo pepa o moliaga o loo molia ai Hunt e oo mai lava i le asō.
Sa saunoa Unasa o le aiātatau i taualumaga paleni lelei ma le lē faaituʻau a le Faamasinoga o le silafia lea e lē o loo molia ona moliaga ma faamautū mai iai sana tali, pe talia pe teena foi.
“The right to a fair trial is knowing what the charges are.”
Sa talosagaina loa e Sapolu le toe faataatia mai i tua o le mataupu se’ia avatu moliaga a leoleo ma sauni iai se tali a Hunt, ona toe valaau ai lea i le taeao lava analeila.
Na tula’i le alii leoleo sa tauaveina le itu a leoleo ma talosaga e toe tolopo le mataupu se’i avatu kopi o moliaga i le loia a Mau.
Sa ia faailoa foi sa tatau ona faailoa atu poo ai le loia a Mau ona latou imeli saʻo lea iai o moliaga, peitai latou te lē iloaina le loia e tula’i mo Mau.
Na toe finau atu le tamaitai loia ia Unasa Iuni Sapolu pe iai pe leai se loia a sē o loo molia, ae tatau lava ona tuu atu moliaga ma faailoa i lē o molia e tapena mai iai sana tali.
Na faataatia e le Famasinoga le mataupu ma talanoa atu ai loa Unasa ia Mau Hunt i sana tali ina ua mae’a tuuina atu moliaga a leoleo ma toe valaau ai lava i le taeao analeila le mataupu.
Talu ai o loo teena e Mau poo Aumau Hunt moliaga a leoleo, ua faamautū ai nei e le Faamasinoga le aso 19-22 o Novema o le tausaga nei e iloilo ai mau a molimau e to’afitu a le itu a leoleo faasaga ia Hunt.
