Taunuu manuia le Minisita o le va i fafo a Niu Sila, Winston Peters i Solomona a o iai i lana malaga taamilo i le Pasefika.

O Solomona le uluai atunuu ua tulaueleele ai le minisita ma lana aumalaga, ao asiasi ai i le Pasefika i le vaiaso atoa lenei lea e uma Solomona ae faaauau atu i Papua Niu Kini, Vanuatu, Niu Kaletonia ma Tuvalu.

Ua fetaui le taunuu o le aumalaga mai Niu Sila ma le amatalia o le faigamalo fou a le Palemia ua tulai mai o Solomona, Jeremian Manele lea faatoa uma ona faatauto e avea ma taitai o Solomona.

E lē gata o se taimi lelei ua feiloai ai ae ua talanoaina ai foi ma fuafuaga o le 100 aso muamua o le faigamalo a Manele aemaise o le galulue faapaaga ma Niu Sila e lē gata i itu tau le tamaoaiga, o taitaiga o faigamalo, aoga ae faapea le tele o itu e ave iai le faamuamua.

Puna o Faamatalaga: Foreign Affairs Minister Winston Peters meets with new Solomon Islands PM | RNZ News