Ua laasia e le auaunaga a le Iunivesite o le Pasefika lea ua iai lona nofoaga i Savaii, se isi tulaga maualuga atu mo aoaoga e faatino i le motu tele i Salafai, ina ua mae’a ma umusa le nofoaga tutotonu fou i Salelologa na fausia i se foai a le Malo o Iapani.
O le Aso Lua o le vaiaso nei na tauaao atu ai e le sui o le malo o Iapani i Samoa, lea nofoaga i sui o le pulega o le iunivesite a le Pasefika faapea le Faatonu Sili o le Matagaluega o Aoga taaloga ma aganuu.
O maota matagofie o le a faaaogā e fanau, i Savaii mo suesuega ia latou mataupu e pei ona iai se potu tusi.
O le tau o le nofoaga tutotonu fou e $499,000 afe tala Samoa.
O le foai a le malo o Iapani e ala i le tupe na fausia ma faafou ai nisi o vaega o le nofoaga tutotonu, o se pine lea o le naunau o lea Malo e fesoasoani i le atinae o aoaoga mo fanau a le atunuu o loo ave a latou mataupu i le Iunivesite a le Pasefika le USP o lona nofoaga autu i Samoa o loo i Alafua.
