Search

Tatala le isi auaunaga fou a le Sanbell

O le afiafi o le Aso Tofi na tatala aloaia ai le isi tautua fou a le Sanbell ua faaigoaina o le Sanbell Events & Conference Centre i Otahuhu.

O lea fale ua tapenaina lea e le Sanbell auā faamoemoega a le mamalu o le atunuu e pei o faaipoipoga, aso fanau maliu ma isi lava faalavelave e ono faaaogāina ai lenei maota.

E silia i le 200 tagata e mafai ona ofi ai totonu o le fale pe a fai ni faamoemoega, faatasi ai ma le tautua masani a le Sanbell e ala i le gaseseina o taumafataga.

O le isi itu o le fale o loo fai ai le faleaiga mo aso uma e maua ai taumafa auā le malu taeao faatasi ai ma taumafataga mo le aoauli ma le afiafi ae tatala lava i aso uma o le vaiaso.

O se laasaga fou ua leva ona saili mamao iai le tofa ma le utaga poto a le susuga i le faafeagaiga ia Tausani Leota Sani Mata’afā ma le faletua ia Christabelle faapea le nofoaalo i se nofoaga e telē atu auā lava le mamalu o le atunuu e ala ia latou polokalame.

O le tautua fou a le Sanbell i le faaaogāina o le fale, afai ae iai ni faamoemoega a le atunuu e faaaogāina ai lenei maota e mafai ona totogi na o le taumafataga ae faaaogā fua le fale mo le mamalu o le atunuu.

Ma o se faamāmā avega lea mo tagata ma aiga faapea le komuniti o loo agai atu e faaaogā le tautua a le Sanbell.

O loo ua iai foi le DJ e faaaogāina mo soo se faamoemoe, ae sili ai o loo iai le nofoaga tele e paka ai taavale a tagata. 

O le susuga i le faafeagaiga ia Jacksyn Siakisimi Lauaki Makisua na saunoa e faafeiloai le mamalu o le auvalaaulia, ae o le faletua ia Logotaeao Poto, ma le faletua ia Sieni Mata’afā na la ootiina le lipine e tatala aloaia ai faitotoa o le maota.

O le susuga i le faafeagaiga ia Iliafi Esera na saunia le sauniga lotu e momoli ai le taulaga o viiga i le Atua ona o lenei faamoemoe ua faataunuuina ma le manuia.

O alo o le susuga i le faafeagaiga ia Tausani Leota Mata’afā ma le faletua ia Christabelle le aualii ia Falefitu ma Tausani sa fai ma fofoga o le afiafi.

Ae mālie i le faafofoga a le auvalaaulia le saunoaga a le susuga ia Tausani na ia faamatalaina ai le amataina o lenei pisinisi, sa amata i le taga falaoamata e tasi, sa tau amata ai le faiga o faapāpā ma masi ona ave lea faatau solo i tagata.

E leai se malolo i le po ma le ao i le taumafaiga mai o lenei pisinisi, sa taufai pea ma finau pea i aso uma ma le talitonuga e leai se mea e maua ma le filemu.

Peitai o le faamaoni i mea itiiti e pule ai i mea e tele.

O lea ua savali i le 18 tausaga o le auaunaga a le Sanbell ma ua faaalia foi le matautia o le Atua i se moemitiga sa iai i le susuga i le faafeagaiga ma le faletua faapea le tautua a le Sanbell.

O le faafetai a le susuga ia Tausani ma lona faletua i lea po, na faafetaia ai o laua aiga faapea uo ma ē masani ona o le lagolago atu i le taumafaiga mai o le pisinisi.

Na afea foi i le faafetai le aufaigaluega a le Sanbell ona o le tautua faamaoni mo le mamalu o le atunuu, ma le faafetai i le la fanau ona o le tutu faatasi e tausoa le galuega ua manuia ai.

Tala sili ona faitaulia

SAMOA UPDATE

TALA FOU MAI SAMOA

Tapunia lala a le ASB 

E 5 lala o le faletupe a le ASB o lea ua tapunia.  O lala i Mangere Bridge i Aukilani, Milford, Wellsford, Waiuku ma Willis

Toaono na pue e leoleo ona o tapaa

E toaono alii mai Vitoria lea ua feta’ua’ina le molia i le asō ona o le taumafai e aumai faasolitulafono sikaleti ma tapaa e miliona

Keep uptodate with Radio Samoa activity & promotion

* indicates required