O loo faatali le afioga Maualaivao Patelesio Ah Him poo afea e faailoa atu ai e leoleo se aso e oo ai luma o le faamasinoga e oo ai luma o le faamasinoga lana tagi na faaulu i le masina o Novema ua tuuaia ai lē sa avea ma Palemia le susuga Tuilaepa Lupesoliai Sailele Malielegaoi faapea lē sa avea ma Loia Sili o le malo ia Savalenoa Mareva Betham, o lē sa avea ma Komesina Leoleo ia Fuiavailiili Egon Keil ma se tasi o Sui Komesina o le Matagaluega o Leoleo le afioga Auapaau Logoitino Filipo.
Faalia e le afioga Maualaivao Patelesio o le sa avea ma sui faipule i le paeaiga o le tausaga 2011- 2016 na avea ai ma se tasi o Minisita Lagolago o lana tagi lea o lo tuuaia ai i latou e pei ona faailoa atu i le faia o se taupulepulega e taofi le sailia ma le faia o le amiotonu e mafua i lana tagi na ave i leoleo i tausaga ua mavae na tuuaia ai se tasi o matai o le latou nuu o Malie le afioga Maualaivao Pepe Seiuli i lona lafo o ni upu tau faifai ma le faalumaluma ia te ia i se fono a le nuu na talanoaina ai sui tauva o le palota tele na faia i le tausaga nei.
O lea tagi sa umi se taimi o faatali e lea tamalii se finagalo a le Matagaluega o Leoleo ae mulimuli ane ina ua ia tuliloa, maua atu le tali a le Loia Sili i lea taimi ua lē lava molimau a leoleo e faia ai ni moliaga.
O le isi tagi a Maualaivao Patelesio na ave foi e leoleo i se isi gaioiga a lea tamālii lava sa ia tuuaia muamua na faia moliaga ma ave ai loa i le faamasinoga lea ua maea ona valaau ma o loo faagasolo ai pea suesuega a le faamasinoga.
Taua e Maualaivao Patelesio “O le agaga tonu lava lena o le mataupu sei faailoa atu i le au tusitala ma le tatou aofia nei mea ua leva na o’u nofonofo ma a’u ae peitai ane e tatau ona o’u faailoa ina ia mafai ona suesueina, o le matuapu ina ia suesueina i latou ia na suia le faaiuga ona e talitonu e iai a le upu lea masani na fai e lē sa taitai i le tatou atunuu, A iloa le mea sese ae lē faasa’oa o le agasala le mea lena, Lea la ou te lē mafai ona tauavea le agasala lea ou te manao i se mea e fia faasa’o. O le fesili pe aisea ua umi ai, ma lē lava mau a leoleo a lea ua faimai o le aua molia Pepe i le taimi nei.”
Na tapā se finagalo a le tamaitia Sui Komesina o Leoleo le susuga Papalii Monalisa Tiai Keti ma ia faamaonia mai ai le tuuina atu o le tagi a Maualaivao Patelesio faasaga i lē sa Palemia, o lē sa Komesina o Leoleo, o lē sa avea ma Loia Sili o le malo ma se tasi o Sui Komesina o le Matagaluega o Leoleo peitai e le’o mafai ona ia faailoa nisi o faamatalaga o le mataupu ona ua tuuina atu le faila i le Loia Sili a le Malo e toe lauliliuina le mataupu nei pe faaauau i le faia o ni moliaga ma oo atu ai i luma o le faamasinoga.
Ina ua tapā se finagalo o le Sui Komesina o loo tuuaia le susuga Auapaau Logoitino Filipo na ia faailoa mai e leai sona silafia i le mataupu ae o lona manatu e mafua ona ia le maua le faila o lea tagi ona o loo tuuaia ai ma ia i le mataupu ua faaulu atu i Leoleo.
