Ua malama ane le aso fou poo le taeao o le Aso Lua i le setete o Maryland i Amerika ua leai se auala laupapa, a le Francis Scott Key Bridge.

Ua lipotia mai anapo e tusa lea o le ‘afa o le tasi i le vaveao taimi Amerika lea na motusia ai le auala laupapa ma fai ifo i le vai o Patapsco ma mai le ofisa o le tineimu i lea lava taimi, e oo atu i le 20 tagata na totofu i le vai o loo sue.

E lei faigofie galuega laveai anapo e lē gata o le tai, o le pogisa o le vaveao ae ua toe faaopoopo iai ma le asu o le vaa la’uoloa na mu i le taimi na taia ai i pou malolosi o loo lalago ai le auala.

Ua lipotia e faapea, o le vaa la’uoloa o le Dali o lea na alu ese mai Baltimore ma o lea ua tapunia ai foi ma le uafu i Baltimore i le taimi nei.

I ata o le mea na tupu o loo iloa ai le solofa ifo i lalo o le auala laupapa o loo iai taavale o loo i luga o le auala i lea taimi.

O le umi o le auala laupapa ua faaleagaina nei e tusa ma le 2,632 mita, ma o lea na tatala i le 1977 ma faaigoa ia Francis Scott Key lea na ia tusia le vii o Amerika.

A o faia ai pea la suesuega, ua faamaonia mai e le Synergy Marine Group lea e onaina le vaa la’uoloa o loo saogalemu uma tagata e aofia ai le aufaigaluega sa i luga o le vaa i lea taimi ma e leai se isi o faamanu’alia.

Saunoa le Pulenuu o Baltimore, o loo ave le faamuamua i galuega laveai a o taumafai e sue ma laveai tagata lea na pa’ūū i le vai.