O le tauaofiaga mulimuli a le faamasinoga o talosaga apili a le faamasinoga maualuga ua faatulaga mo le masina o Novema o le tausaga nei, o le a suesue ai le talosaga a le afioga i le Fofoga Fetalai ua toe lui si ni vaega o le faaiuga na faamuta ai e le faamasinoga le faasalaga o sui faipule o Lepa ma Faleata 3.
A o tālia lea suesuega e lei faamautuina se aso e fofogaina ai le talosaga a le Fofoga Fetalai e ala i ana loia, lea ua tatalo ai i le faamasinoga maualuga e taofi le faaaogāina o le faaiuga ua toe faaa’e ai i le Palemene sui faipule na faamalolo lē tumau mo le lua tausaga le susuga Tuilaepa L Sailele Malielegaoi ma le tofa Lealailepule Rimoni Aiafi, seia mae’a ona suesue le talosaga apili faasaga i lea faaiuga.
Ua faaalia e le Fofoga Fetalai le susuga Papalii Lio Oloipola Taeu Masipa’u, ua mae’a ona logoina sui faipule e toalua faatatau i le isi laasaga ua agai iai le mataupu, ma o le a fono foi le komisi a le Palemene e talanoaina ai lea laasaga ma tuuina atu i luma o le laulau a fono i le isi tauaofiaga a le fono aoao faitulafono ua faatulaga mo le masina o Oketopa.
