Faafetai tele i lo outou auai mai i lenei itula. Manatu ua mae’a tapua’iga masani sa feagai ai ma tatou i lenei Sapati o loo faapea ona tatou faamamalu pea iai ona o lona tāua i si o tatou atunuu.

O lea ua utu le malama i le tula o mauga o lenei aso fou…ma lenei taeao manuia i le alofa tausi mai o lo tatou Atua.

Ua ou manatu o le a fata ia i mauga o ao ma mapu ane i tuloto ou sa ma ou mamalu Samoa…..auā o mamalu ua taoto, a felaga’i! ona faigata lea.

Ae ou te talitonu ua lē o toe po se lilo i tala ave foi i luga o auala televavave i le faalavelave na tula’i mai i le po anapo, na pa’ulia ai se vaa o le fuāvaa o le Vaega’au a le Navy, a le Malo a Niu Sila i le ā’au i tua atu o le gataifale o le afio’aga o Siumu.

O galuega faatino lava o le tapenaga o le tatou taligamalo i atunuu o le Taupulega lea ua lē o toe mamao.

Ua faamautinoa mai e to’a 75 le auvaa i le taimi na tupu ai le faalavelave atoa ai ma tagatānuu e lē o ni tagata militeri, o ni tagata su’esu’e faasaienisi e to’afitu, ae to’afā isi tagata militeri mai isi atunuu.

I le taimi nei e le’i mautinoa ma manino mai le mafua’aga o le faalavelave poo le mafua’aga foi na oso ai le vaa i luga o le ā’au. Masalo o se taimi ona tuuina mai lea o se lipoti aloa’ia o lea tulaga pe a mae’a su’esu’ega.

O le mea ua mautinoa o loo saogalemu uma le auvaa, e ui ina sou, pogisa ma matagi le sami i le itula na tula’i mai ai le faalavelave. O se tala e faapea o le vave o le mafaufau o le Kapeteni na ia faia ai se faai’uga ma faatonuina uma ai le auvaa e tuua loa le vaa a o lei sa’e ma ono tula’i mai ai nisi aafiaga faigata, lea ua mafai ai ona lavea’ia uma lana auvaa.

O le tulaga lavea’i o le auvaa sa faapea ona vave atu iai auaunaga faapitoa o le saogalemu ma le lavea’i a le tatou malo, le Matāgaluega o Leoleo ma le Pulega o Tineimu ma Faalavelave Tutupu Faafuase’i. Sa faapea ona auai atu ma le tatou Vaa o le Nafanua mo se fesoasoani.

Sa maua le matou feiloa’iga ma le auvaa a Niu Sila ananei i le taeao faapea foi ona maua ai nisi o faamatalaga o lenei faalavelave i se faamalamalamaga a le tamaitai Kapeteni (Ship Commander).

Sa faaoo mai foi le faafetai a le auvaa ma le Kapeteni o le Vaa, i tulaga lavea’i e pei ona auai atu le tatou Malo i lona faatinoga ina ua tula’i mai le faalavelave i le vaeluaga o le po anapo. O le vaega na muamua taunuu i le matāfaga poo le saogalemu lea, e tusa lea ma le itula e tasi i le vaveao ananei i le taeao.

Ma ou te fia faaoo atu foi lenei faamalo i le Komesina o Leoleo, ma le Komesina o Tineimu ma Lavea’i Faafuase’i, le Kapeteni o le Nafanua ma i latou uma sa faatinoina lenei galuega lavea’i mo le auvaa e 75 a Niu Sila.

O le leai o se soifua ua ma’umau, o le vaaiga lea o le tou lava tapena i le tatou taligāmalo, ma le maualuga o le tulaga o lo outou tomai ua iai nei la outou auaunaga i le tatou atunuu. Faamalo le galulue.

O le tulaga sa iai e faapea, i le te’a o le itula e ono i le taeao nei, na amata ai loa ona vaaia le asu, ua mu le vaa ma aga’i ai loa ina goto. I le ta ai o le 9 i le taeao nei, na iloa ai ua i lalo uma le tino atoa o le vaa i le sami ma ua lē toe iloa atu.

O loo galulue pea le tatou vaega o faalavelave faafuase’i e iai leoleo, le matāgaluega o le si’osi’omaga, le pulega o vaa a Samoa, ma le ofisa o Tineimu e mata’itū pea se tula’i mai o se masaa o se suāuu i luga o le sami e ono aafia ai le ā’au, figota ma i’a ma mea uma o loo ola i luga o le gataifale ne’i faatama’iaina pe a tula’i mai lea tulaga o le suāuu masaa.

Sa maua foi le ma talanoaga ma le Alii Palemia o Niu Sila i le itula e 12 analeila, le afioga ia John Luxon, ma sa momoli mai lana faafetai i le tatou malo mo galuega lavea’i ma fesoasoani na faia mo le auvaa. Na maua e le’i faigofie le galuega lavea’i e pei ona iai, ona o le loulouā o le tau i le taimi o le faalavelave, aemaise o le pogisa.

O loo sauni mai foi le Malo o Niu Sila i sa latou fesoasoani ua lē gata i le auvaa ae o su’esu’ega ma se faai’uga o le a faia i le vaa. O le aoauli nei la, o le a tuua ai e le vaalele faapitoa, o se vaalele militeri ua ta’ua o le C130 Niu Sila mo Samoa, e aumai ai ni tagata tomai faapitoa ma nisi o meafaigaluega faapitoa mo le galuega ma ni su’esu’ega o loo fia faia i lenei faalavelave. O le a ave le latou faamuamua i le puipuiga o le si’osi’omaga ia aua ne’i iai ni aafiaga o le tatou gataifale ma le si’osi’omaga faalenatura.

I le taimi nei o loo galulue le tatou pulega o le NEOC poo le ofisa o faalavelave faafuase’i faatasi ai ma le malo o Niu Sila i fesoota’iga ma vaega eseese uma e tatau ai i taimi o ni faalavelave faapenei.

Ia, o le uiga lava o lenei faasalalauga ina ia nofo silafia e le mamalu o le atunuu mea o loo tutupu mai, aemaise o lenei taimi a o tatou sauni atu mo le tatou taligāmalo i le fonotaga a ta’ita’i o Malo o le Taupulega a le lalolagi, Samoa CHOGM 2024.

Talosia ia, ia tomua mala, ae ia sao ma uli lo tatou faamoemoe i le alofa ma le agalelei o le Atua.

Faafetai.