O tapenaga a le afio’aga o Leauvaa e faamatagofie ona lumāmaota ma aai auā le taligamalo a le atunuu i le fono o loo faagasolo a ta’ita’i o malo o le taupulega, ua matuā maofa ai ma faafiafiaina le Palemia o le Malo o Fiti, ona o le atunuu lea o loo talimalo ai Leauvaa i ana tapenaga.

O le faagaeetia o le ta’ita’i o lea malo e pei ona faailoa e se matai o le nuu le tofa Vaifale Iose, na ave ai lona mana’o pe mafai ona ia afea Leauvaa a o aga’i mai i Apia pe a taunuu i le afiafi o le Aso Lulu o lenei vaiaso.

O le mafuaaga lea o le tapena a le afio’aga ina ua latou talia fiafia lea mana’oga o Sitiveni Rabuka le Palemia o Fiti, ma ua sauni ai i se latou tali faaaloalo ma faaee ai ma se suafa matai o le Palemia.

Ua faamaonia mai e le tofa Vaifale Iose o le suafa Tagaloa o le a faafotu Tupu ai le Palemia o Fiti o Sitiveni Rabuka.

O le afiafi o le Aso Lulu o le a faatino ai lea faamoemoe, ma a mae’a ona faaauau mai lea i le faletalimalo i Apia o le a faamautū ai le ta’ita’i o le Malo o Fiti, e sauni ai i le fono a Malo o le Taupulega.