Ua pasia e le maota le tulafono o le a faasā ai ona toe vaaia i nofoaga faitele togiga, pine ma isi faailoilo e iloa o ni sui o kegi.
O le pili lenei o le Gangs Legislation Amendment Bill ma o lea na pasia i le aoauli ananafi e le Palemene ma mautinoa ai loa o le aso 21 o Novema e aloa’ia ai lona faatulafonoina.
O le tulafono foi lenei o le a mamafa ai faasalaga mai le faamasinoga e tuu atu i sui o kegi.
I se faamaoniga mai le Minisita o Faamasinoga, Paul Goldsmith, e 51% ua alu ai i luga sui lesitala o kegi faamauina i totonu o le 5 tausaga talu ai, ae 33% ua alu ai i luga le tele o solitulafono.
E ese mai le laeiina o togiga e sui e kegi, o loo aofia ai foi i lalo o le sā lenei togiga e faalauiloa mai totonu o taavale.
O le feau mai le minisita i sui o kegi, ua uma taimi na tafilisaunoa ai ma tele ina faamata’u ai tagata lautele ua pei i latou o nisi e i luga atu o le tulafono.
Puna o Faamatalaga: Gang patch legislation passed into law (1news.co.nz)
