Toe tulai mai foi le isi mu tele anapo i Matu o Canterbury ma na matuai iloga ona aafia ai ma femalagaa’iga e faaaogā ai le State Highway 1.
E ta ane le iva anapo ua malolo helikopa e lua lea na fuiina mai le ea ae faaauau pea galuega a le tusa ma le 60 o sui o le tineimu, ma o le taimi foi lea ua mafai e sui o le tineimu ona taofiofi le sosolo o le afi.
I lipoti lata mai i le taeao nei mai le ofisa o le tineimu e tusa ma le 5 kilomita le mamao na oo iai le mu, ma e iai aiga na aveesea faamalosi mai o latou fale ma o nisi na toe foi ane lava anapo e lei ta le 12.
O itu uma e lua o le motorway lea na mu ma lipotia e le Herald e 7 ofisa fuimu eseese na taumafaia le mu anapo.
Na tatala ai ma nofoaga lē tumau e lua e le Hurunui District Council anapo e agai iai aiga na aveesea faamalosi mai o latou fale.
E ese mai le mu anapo, o le afiafi foi o le Aso Sa na ta’ua mai ai le isi mu tele i Canterbury lea na tele ina mu uma ai le tele o paina e tusa lona mamao ma le 80 eka.
