O suesuega faagasolo a leoleo i Tuasivi Savaii i le gaioiga solitulafono na tulai mai i le po o le Aso Faraile na tea nei lea na fasia ai se taulealea o se maupaolo i le nuu o Samalaeulu ma maliu ai, ua taofia ai nei e leoleo se taulealea 21 tausaga le matua o lea afioaga.
O lē ua fano ai lona soifua e 22 tausaga le matua o le nuu o Tuasivi ma Fogapoa.
Ua faailoa i lipoti mai leoleo, o se feeseeseaiga i le va o lē ua molia ma lē ua maliu na mafua ai le solitulafono lea ua molia ai lē ua taofia i le moliaga o le fasioti tagata faamoemoeina.
O se mataupu muamua lea tau solitulafono e aafia ai le faaoo o le maliu i se isi tagata ua lipotia i leoleo i le masina amata o lenei tausaga fou 2024.
O loo faaauau pea suesuega a leoleo.
