Ua taofia e leoleo le alii talavou na maua i le fale o le Palemia, Christopher Luxon i le po o le Tausaga Fou.

O le fale lenei e faitau miliona lona tau i le motu o Waiheke lea e faapea e ana e Luxon ma lona aiga, ma o le te’a laititi o le 12 i le po o le Aso Sa lea na maua atu ai e leoleo.

Na taofia ai ona o lona iai faasolitulafono i le fale ma e faapea sa iai manu’aga i lona lima ma o lea na togafitia lava e leoleo faapea le ambulance na iai i lea taimi ma e lei moomia ai le alu i le falemai.

I le lipoti a le Herald o le fale lenei poo le holiday home o le Palemia ma lona aiga i Waiheke e silia ma le $6 miliona lona tau.

Ona o le laititi o tausaga o le alii talavou o lea ua tuuina atu ai i le Youth Aid Services.