Ua manumalo le apili a le Crown na faia faasaga i se faaiuga a le faamasinoga e faatatau i tagata na tipoti mai Ausetalia.
Ua faailoa i lipoti a le Stuff i le asō, o se sitiseni Niu Sila na tipoti mai Ausetalia i le 2019 ina ua mae’a ona tuli lona faasalaga i le falepuipui, na ia faaali lona manatu ua faalua ona faasala o ia ma sa ia ave ai leoleo, vaega o faasaoga ma le faamasinoga faaitumalo i Uelgitone i le tulafono.
Sa faailoa iai e le komesina o leoleo o tagata sa faafalepuipui i Ausetalia ma toe tipoti mai i Niu Sila e le o toe faasalaina ae e iai vaega o loo tuuina ai ni tapulaa i saolotoga ma le aumau ai i le atunuu.
O le asō la ua faailoa mai ai le tuuina o le faaiuga a le faamasinoga i le mataupu lea ua toe suia ai ma le faaiuga na faia i le tausaga talu ai e le faamasinoga na malo ai le tagata lea na tipoti mai ma o loo iai le poloaiga a le faamasinoga e faasā ai ona faailoa le igoa.
O le fuainumera 501 e faatatau i le vaega o le tulafono le Australian Migration Act lea e faatulaga ane ai aiaiga mo le tipoti ese o se tagata mai Ausetalia.
O le Crown o le pulega a le faigamalo o loo iai a le atunuu.
