Ua alia’e nisi o faamatalaga e faatatau i le loli sa lipotia atu i le aso ananafi i talafou lea na lavea i se tasi o highway i Sini i le M7 ae sosola ese le aveloli ma le isi alii na malaga faatasi ane ai.
Ua ta’ua i lipoti i le ABC o le loli lea na tia’i ai e le vaega lea i le auala sa iai ma le 3 afe lita o le kiso na gaoia mai se pamu.
O le taeao ananafi na tupu ai le faalavelave na mafuli ai le loli lea ma masaa ai se vaega o le kiso i le auala.
Fai mai e foliga sa taumafai le aveloli e U-Turn i le ogatotonu o le highway ma iu ina mafuli ai.
O le tala mai leoleo i Fairfield o le aualii ia na agai i se pamu i le faaitu lea ma gaoia ai le tusa ma le 3 afe lita o le kiso pe ā ma le 6,300 le tau.
Fai mai sa teuina le kiso lea i ni containers se tolu i le loli ae leiloa e leoleo pe o le ā tonu e faaaogā ai le kiso e i laua ia.
E leai se tasi na faamanu’alia i le faalavelave e ui na matuai poloka ai lava le alatele i le aso ananafi.
Ua faamatuu mai e leoleo ata o le aualii e toalua o loo tau sailia ma unaia se tasi e silafia ni faamatalaga i le mataupu lea ina ia faafesootai atu le ofisa o leoleo i se taimi vave poo le crimestoppers.
