O ni alii se to’afa faapea se tamā ma sona atalii 17 tausaga le matua, ua molia nei e leoleo i ni solitulafono e fesootai ma le umia o nakoti (narcotics) poo le pauta faasāina o le aisa ma laau faasāina o le mariuana.
E lua gaioiga a leoleo na alu, ma maua ai ni alii se to’afa i Vaimoso i le osofaiga muamua, ae o le osofaiga lona lua i Falelauniu tai, na molia ai le tamā 44 tausaga le matua ma lona atalii 17 tausaga.
O le aisa foi, o laau faasāina ma fatu mariuana na maua o umia e lea tamā ma lona atalii.
Ua faaalia e le matagaluega o leoleo e tele ni meatotino na maua i le latou osofaiga i Vaimoso e pei o masini computers ma nisi o masini faatekonolosi e pei o telefoni feaveai, ma e iai le talitonuga o ia masini ua faia ai fefaatauaiga ae maua ai pauta ma laau faasāina.
O le aso 17 o Aperila e valaau ai i le faamasinoga sili, moliaga o i latou uma nei ua molia.
