E leai se talosaga ua tuuina atu e le Lakapi Samoa i le Malo mo se laveai, e faatupe ai le malaga taamilo i Europa a le aulakapi tele a le atunuu le Manu Samoa, e pei ona fuafua mo le masina o Novema o le tausaga nei.
O se pepa o faamatalaga faalauaitele mai le Minisita o le Matagaluega o Taaloga ma Alaga’oa mo le Soifua Fiafia o Tagata, le afioga Laumatiamanu Ringo Purcell, ua faailoa ai lea tulaga i sana tali atu i le finagalo ua faailoa lautele e le ta’ita’ifono o le komiti faafoe o le Lakapi Samoa, o le ta’ita’i foi o le Itu Agai le susuga Tuilaepa L Sailele Malielegaoi.
E pei ona silafia o le feiloa’iga masani a tusitala ma le ta’ita’i o le Itu Agai na fesiligia ai i sona finagalo i lona tulaga o le ta’ita’ifono o le komiti faafoe o le Lakapi Samoa i le mafuaaga o le faai’uga e taofi le malaga taamilo i Europa a le Manu Samoa.
Na tuua’ia ai e le ta’ita’ifono le Palemia ma le Malo i le taofi o fesoasoani sa masani ona maua e le Lakapi Samoa, le mafuaaga o lea faai’uga.
Peitai i le tali a le Minisita o Taaloga ma Alaga’oa mo le Soifua Fiafia o Tagata ua faaalia ai e Laumatiamanu Ringo Purcell, o le malaga taamilo i Europa o se tulaga masani i tausaga ta’itasi, o lona uiga e lē o se mea faato’ā iloa nei poo ananafi.
O ia malaga taamilo e 12 masina e faataoto mai ai mo le faia iai o tapenaga, ma o le upu moni e lei tuuina atu se talosaga a le Lakapi Samoa mo se fesoasoani a le Malo.
Faaalia e le Minisita sa avatu le talosaga ia Aperila ae sa talosaga ai le Lakapi Samoa e avatu atoa se vaegatupe a le Malo e tasi tesimale lima miliona ($1.5million) auā le faagasologa o fuafuaga ma faamoemoega a le Lakapi Samoa.
Peitai e taunuu lea talosaga ua faai’ui’u le tausaga faaletupe 2023 i le 2024, o le taimi lea ua tau faasoasoa seleni a le malo o loo totoe o lea paketi mo fuafuaga o loo ave iai le faamuamua a le Malo i lea taimi.
E avatu le talosaga lea a le Lakapi Samoa e pei ona faailoa e le minisita, o loo iai le talosaga a le autaaalo a Samoa mo taaloga a le Pasefika lea sa ave iai le ‘afa miliona poo le lima selau afe tala.
Sa lē talia le talosaga a le Lakapi Samoa mo se tasi ma le ‘afa miliona ona o le taimi foi lea e pei ona faailoa e Laumatiamanu ua lē toe mamao mae’a le tausaga faaletupe 2023 i le 2024, faaopoopo iai ma tapenaga mo le ‘au masii a Samoa i taaloga a le Olimipeka lea ua mae’a sa faia i Farani.
Ua faailoa foi e le minisita sa ave e le malo le 600 afe tala mo tapenaga a le Manu Samoa i le Ipu o le lalolagi.
Ua faaalia lava e le Minisita o Taaloga ma Alaga’oa mo le Soifua Fiafia o Tagata, e foliga i le finagalo o Tuilaepa ua tuua’ia le malo ua leaga, ae e leai se talosaga na avatu mo le malaga taamilo i Europa.
