E mamao ma se fuafuaga a le ta’ita’ifono ma le ta’ita’i o le pati faaupufai o le Faatuatua i le Atua Samoa ua Tasi faapea sui Faipule o loo avea pea ma sui o le vaega faaupufai, le faia o se tapenaga e faatū ai se lafo o le lē faatuatuaina e aveesea ai le ta’ita’i o le Malo le tamaitai Palemia le afioga Fiame Naomi Mataafa.
O loo faamoemoe le susuga Laauli Leuatea Polataivao Fosi Schmidt ma faipule o lana pati, i le vaega 141 o le tulafono o faigapalota 2019 e soloia ai nofoa o Lotofaga, Gagaemauga Numera 1, Faleata 2, Salega 2, Vaimauga 4, ma Aana Alofi 4.
O le vaega 141 o lea tulafono o loo aiaia ai e mafai ona soloia le nofoa o se tofi faipule o le Palemene pe a faamavae le sui faipule mai le pati sa iai lana lagolago, pe ua na tuua foi i lona loto malie pe ua suia se vaega faaupufai ua lagolago iai.
E pei ona silafia na faamuta e le faafaletui e ala i se tusi le toe avea ai ma sui o le pati faaupufai o le afioga Fiame Naomi Mataafa, afioga Tuala Tevaga Iosefo Ponifasio, tofa Olo Afoa Fiti Vaai, tofa Leatinuu Wayne Sooialo, tofa Faualo Harry Schuster ma le afioga Toeolesulusulu Cedric Schuster.
O le finagalo o ta’ita’ifono ma le ta’ita’i o le Faatuatua i le Atua Samoa ua Tasi i le feiloa’iga ma tusitala na ia tali ai foi i fesili faasino i le tusi atu o le Minisita o leoleo e avea ai ma sui o i latou e to’aono ua aveesea ma le vaega faaupufai, lea sa faailoa ai e le tofa Faualo Harry Schuster i le tusi na ave ia Laauli, e solifaavae ma solitulafono le latou faai’uga ma o loo tumau pea le avea o i latou ma sui auai o le pati.
Le susuga Laauli Leuatea Polataivao Fosi Schmidt ua avea nei ma ta’ita’i o le vaega faaupufai o le Faatuatua i le Atua Samoa ua Tasi.
