Talu ai ona ua faamaonia se tasi o loo aafia i le faamai o le koviti19 na malaga atu i Ueligitone i le faaiuga o le vaiaso na tea nei lea ua tonu ai i le malo e se’e atu Ueligitoge i le Level 2 ae mo Niu Sila atoa Level 1.
E ui e le’i faamaonia mai ae taua e le NZ Herald o le tagata lea na malaga mai i Niu Sila o loo masalomia le aafia lea i ituaiga koviti ua taua o le Delta Strain lea e faalua lona malosi ma le vave lona pipisi faatusa atu i le ituaiga Koviti i le tausaga na te’a nei. O le ala lea ua agai ai Niu Sila e faamalosia le taofia o soo se faatasiga tetele e pei o le au matamata o le taaloga o loo loma nei.
Na faamaonia mai i se pepa o faamatalaga mai le Lakapi Samoa e lagona le faanoanoa ona o ua le mafai ona auai le au maimoa i le malae taalo ae talitonu o le a maimoa uma le toatele i le Sky Sport o le a tuusa’o atu ai lenei taaloga.
Taua e le Kapeteni Vaovasamanaia Seilala Mapusua “o le a finau malosi i le uluai taaloga ma le Maori All Blacks mo se ai mo Samoa”.
O pepa ulufale uma na faatautina e tagata lautele o le a mafai ona toe faafoi seleni na faaogaina (tickets will be fully refunded).
