Ua maea le fono faaletausaga muamua a le vaega faaupufai o le Faatuatua i le Atua Samoa ua Tasi lea sa usuia i le aso Toonai na tea nei, ae o se faatasiga na momoli atu ai i le taitaifono o le vaega faaupufai ma se tusi mai le Sui Palemia e avea ai ma sui o Minisita uma o le Kapeneta e aofia ai le Palemia o loo faailoa ai atugaluga ma faanoanoaga i le usuia o le fono faaletausaga ae e iai vaega ua solia ai aiaiga o le faavae o le pati faaupufai e faasino i le taloina o se fono faaletausaga.
O se tasi o ia aiaiga o loo faailoa e le Sui Palemia le afioga Tuala Tevaga Iosefo Ponifasio ile tusi, o le puupuu o le taimi na faia ai le faalauiloa o le fono ina ia lava ai le taimi o sui lagolago e auai.
O loo faailoa foi e le Sui Palemia i le tusi le teena e Minisita e 15 o le Kapeneta o le auala na tapena ma faasalalau ai le fonotaga.
E ui ina faailoa e le taitaifono ma le taitai fou o lea vaega faaupufai ua faatea Minisita e toaono e aofia ai le taitai o le malo ma le latou vaega faaupufai ma le faafaletui o faipule, ae o le tusi a le afioga Tuala o loo faailoa ai o latou uma o sui aloaia o le pati ma o le isi lea o lape ile tapenaina o le fono, o le leai o se fesootaiga ma le tamaitai palemia o le taitai o le vaega faaupufai.
Ua faailoa ai e le Sui Palemia i lana tusi, e faaauau ona totogi a latou lesitala o sui o le vaegafaaupufai.
Peitai o soo se faaiuga e taunuu iai le fono faaletausaga ua maea atu nei e le tatau ona aloaia, ma o le a fetaia’i ma ni lu’i. O le feiloaiga a le au faasalalau ma tusitala ma le taitai o lea patgi faaupufai ile aso Faraile ua mavae sa faailoa ai e le susuga Laauli Leuatea Polataivao Fosi Schmidt, o le fono lea e faia ai ma le faaiuga o minisita e toaiva o le kapeneta sa latou le lagolagoina le lafo o le le faatuatuaina o le Palemia ma le kapeneta lea sa tuuina atu e le faipule o Gagaifomauga 3 i le Palemene.
Sa tāpā se finagalo o le taitaifono ma le taitai ua iai nei o lea pati faaupufai, ae ua ia faailoa mai e Laauli o le a oo iai sona finagalo i vaega ua laga i le tusi pe a oo ile feiloaiga masani ma tusitala.
