Ua lapata’i mai leoleo i le aufaitaavale ua iai nisi faiga ua vaavaai iai le augaoi taavale ua taula’i ai a latou taumafaiga i nisi o ituaiga o taavale ua taatele i lenei vaitau ma ua atili faatupula’ia ai ia ituaiga soligatulafono.

Ua lē o toe po se lilo i le tulaga ua iai le faafitauli lea o le gaoia o taavale aemaise lava mai i luga o magāala faapea foi ma aualataavale poo driveways a aiga.

Fai mai leoleo o le tele o mataupu faapea e lipoti atu ia i latou e ta’ua ai e avetaavale o loo ia i latou ki o a latou taavale peitai o loo mafai lava ona gaoia taavale.

Fai mai leoleo o le augaoi taavale ua o latou faaaogā ni ituaiga masini fou faaonaponei e pei ona faaaogāina i atunuu e pei o Amerika ma Peretania ma ua amata nei ona taatele i Ausetalia.

O lea faiga ua mafai ai ona faapolokalame ia ituaiga masini ina ia tai tutusa ma ki o taavale ma o le taimi e sao ai le tagata gaoi i totonu o le taavale e mafai ona faapipii le ituaiga masini lea i le dashboard ma mafai ai loa ona faaola le taavale.

O le lapata’iga a leoleo ua vaaia le siitia o le numera o ituaiga taavale ua gaoia, taavale e mafai ona faaaogā ai ia ituaiga masini ma ua lapata’ia ai le aufaitaavale ia silasila i auaunaga ma upega tafa’ilagi ua faailoa ai auala e taofi ai le gaoia o taavale e ala i le faaaogāina o ia ituaiga masini faaonaponei.

Puna o Faamatalaga: https://www.9news.com.au/national/third-party-technology-behind-surge-in-victorian-vehicle-thefts/791427e1-f4f1-4f25-af2c-cbe97cdcb07f