E manatu le Premier o Niu Sa Uelese, Chris Minns e lē tatau i tamaiti i lalo ifo o le 16 tausaga le matutua ona maua le avanoa i le social media, ua faia ia faamatalaga a o silasila ai le setete i le faatulagaina o ni tausaga e faataga ai ona faaaogā ia auaunaga.
O le vaiaso nei na faalauiloa mai ai e le faigamalo a le setete o NSW le faia faavavave o se fonotaga i le mataupu lea i le social media ma ua lagolago ai le Premier i taumafaiga ina ia faaitiitia ai le aofai o tamaiti e faaaogāina ia auaunaga.
Fai mai Minns o ia e manatu o le 16 lava le tausaga talafeagai.
O isi auaunaga social media e pei o le Instagram ma le Facebook e manaomia ai ona 13 tausaga ma sili atu ona faato’ā mafai lea ona lesitala peitai la fai mai Minns ua vaavaai nei i le faatulafonoina o le tausaga e mafai ai ona faaaogā ia auaunaga ae manaia foi ae faasoo ai le atunuu i sea faiga.
E lata i le 10 miliona ua inivesi e le faigamalo a le setete mo se polokalame e faataitai e faatatau i tulaga faapea ma o le fonotaga tele lea a NSW o le a faataunuuina ia Oketopa ma o le a aofia ai tagata a’oa’oina, o i latou e galulue i faiga faavae a le malo ma sui mai ofisa e feagai ma auaunaga ia tau social media.
Puna o Faamatalaga: https://www.9news.com.au/national/nsw-premier-chris-minns-backs-increased-social-media-age-restriction/8661dee6-2d79-494c-ac56-6f392ea70984
