Ua faatali nei le aufaigaluega a le kamupani o loo gaosia le beer o le Vailima i se tali atu a le pulega o le kamupani e faamanino atili ai mo lo latou silafia, mafuaaga o le faai’uga e siitia le gaosiga o le Vailima i Fiti.
O lea ua faailoa e le nusipepa o le Sunday Samoan le tusi a le aufaigaluega ua ave i le ta’ita’ifono o le komiti faatonu o le kamupani, ma ua faailoa iai vaega e tatau ona faamalamalama atu, e pei o le faavae o le faai’uga e faapea ua tuai masini o loo gaosia ai le beer, faaletonu seleselega a le kamupani i le lima tausaga ua tuanai, ma aafiaga o le kamupani ona o le faama’i misela, ma le Koviti-19.
O loo faailoa e le aufaigaluega tulaga lelei sa iai le toe fetuuna’iga o galuega a le kamupani talu mai le tausaga e 2019, lea sa faailoa e se tasi sa avea ma ta’ita’ifono ma ia faafetaia ai le punoua’i ma le galulue lelei o le aufaigaluega, ma o lea foi sui sa ta’ita’ifono na ia fautuaina vaega e ao ona faaleleia e saga faaauau ai tulaga lelei ua ausia e le kamupani.
O le vaitau foi lea e faapea mai le aufaigaluega i le latou tusi na aveesea uma ai ni tagata faigaluega sinia mai Fiti ae faaaogā tagata Samoa e faafoeina nisi o galuega i le pulega o le Vailima.
O le faai’uga o le tausaga nei o loo fuafua e mae’a ai galuega o le toe gaosia i Samoa o lea oloa tau avamalosi, peitai o le tusi ua ave nei i le ta’ita’ifono ma le pulega o le a iloa ai se isi laasaga pe o le a tafa le finagalo o i latou o pulea ma umia le kamupani pe iai se suiga i le latou faai’uga ua mae’a ona faalauiloa lautele.
