E lē toe tau faailoaina i lo tatou atunuu faigata tau tupe sa feagai ma nisi o auaunaga ma tautua a le Malo faapea pisinisi tuma’oti, ona o aafiaga mai puipuiga o le faama’i Koviti-19 na tapunia ai malae vaalele, faapea le femalagaa’i o tagata.
O ni mafatiaga e 3 tausaga o tauave e atunuu uma o le lalolagi e aofia ai ma Samoa, ae o le toe tatala o tuaoi faavaomalo ma toe faaauau malaga a vaalele ma vaa tetele la’upasese o le sami ua toe foia ai ia mau faaletonu tau tupe.
O le Pulega o Malae Vaalele a Samoa le Samoa Airport Authority o se tasi o auaunaga tuma’oti a le Malo sa aafia tele ana tupe maua ona o puipuiga o le faama’i Koviti-19, peitai o lea ua toe tulaga lelei ma ia ausia ni tupe faasili ua mafai ai ona tuuina atu lona sao tau tupe le dividend, e tasi le miliona tala mo galuega faatino a lo tatou Malo.
O lea sao tau tupe sa talia e le Minisita o le Matagaluega o Faalapotopotoga Tuma’oti a le Malo le tofa Leatinuu Wayne Sooialo, ina ua tauaao iai e le Minisita o Galuega Tetele ma Pulega o Malae Vaalele le tofa Olo Afoa Fiti Vaai.
Ua faailoa ai e lea faalapotopotoga tuma’oti a le Malo o lea foi sao tau tupe na mafai ona faamaopoopo mai tupe faasili na maua e tusa ma le 2 miliona 324 afe ma le 264 tala ($2,324,264.00).
O ia tupe faasili na maua mai le aofaiga atoa o tupe maua o le tausaga faaletupe na faaiuina ia Iuni o le tausaga ua mavae 2023, lea e silia ma le 6 miliona tala ($6,640,755).
O le 35 pasene o tupe maua e aofia ai ma tupe faasili ua tuuina atu e le pulega o malae vaalele mo galuega a le Malo e pei ona tauaao nei lea seleni e le minisita o faalapotopotoga tuma’oti uma a le Malo.
O le susuga Tumanuvao Evile Falefatu o loo avea nei ma Ofisa Sili poo le General Manager o le Samoa Airport Authority le Pulega o Malae Vaalele a Samoa.
