O le nofoaga mo suesuega faasaienisi a le atunuu o loo i Nafanua, o se nofoaga ua tapuvae tasi iai suesuega o laau tau faatoaga ma isi sailiiliga faasaienisi, ua galulue faatasi nei ma se faalapotopotoga o suesuega faasaienisi mai le atunuu o Saina e ta’ua o le Chinese Academy of Tropical Sciences.
Ua mafai ona galulue faatasi nei itutino e lua ina ua mae’a faamautu se maliega i le va o le nofoaga o suesuega faasaienisi a Samoa ma lea faalapotopotoga o tomai tau suesuega o laau tau faatoaga a Saina.
O se sootaga o le a mafai ona maua ai e le aufaigaluega i le nofoaga o suesuega faasaienisi a le atunuu, aoaoga ma isi fesoasoani e siitia ai le tomai i le faia o suesuega.
Ua faailoa i se pepa o faamatalaga o le tasi o autu o le maliega ua sainia, o le tuu mavaevae lea o vaega e patino tonu i itu taitasi mo suesuega ina ia mafai ona tau fai maua ai ni faamanuiaga poo penefiti.
