O loo faagasolo nei suesuega a le Matagaluega o Leoleo i tulaga na afua ai ona uma le ola o se taule’ale’a lea na maua lona tino maliu i le vaiaso na tea nei i Moamoa.
Na faamaonia e le Sui Komesina o Leoleo Auapaau Logoitino Filipo i le Samoa Observer le faaauau ai o suesuega ma sailiiliga o lea mataupu. Taua e Auapaau na logo atu i latou i le Aso Faraile lava lea o oe vaiaso na te nei e se tamā sa agai atu i lana maumaga ma ia vaaia ai se tino maliu o se alii o loo taatia i se tasi o vaega o lea nofoaga ma ia faafesootai ai loa leoleo.
Taua foi e Auapaau e iai se ulugalii mai i Moamoa lava na faafesootai atu leoleo ma faapea o le alii lea na maua lona tino maliu o le la tama lea. Na o la taua i leoleo e 1 le vaiaso leiloa ai si o la alo (went missing) ma e 14 tausaga o le atalii. Peitai sailiiliga muamua a leoleo na maitauina ai o le tino maliu e foliga mai ua leva ona pala (sei tulou ) ma sa le gata ina lāina ma timuia i se taimi umi lava o le mafuaaga lea ua i se tulaga faaletonu tele.
O le taimi nei e le’o faatulaga mai se gaioiga faasolitulafono na afua ai le maliu o lea alii aua o loo faia pea suesuega ma o loo taofia pea i le maota gasegase i Motootua e tālia ai suesuega faapitoa a i latou e iai le tomai e saili ai le mafuaaga tonu o le uma o le ola o lea alii.
