O le afiafi ananafi na faia ai siaki mulimuli i afi lisi e lima ua mae’a faatutū ma faaola i le nofoaga i Fuluasou o loo faasoa atu ai le eletise i le tele o vaega o Upolu.
Talu mai lea laasaga na taunuu iai galuega sa amata faatino mai le vaiaso ua tuana’i o loo mata’itū nei e le faalapotopotoga i ana inisinia ma se inisinia mai le kamupani Niu Sila o loo aumai ai ia afi eletise, poo ua tulaga saogalemu ma lelei le faaaogāina.
O le Aso Lua o le vaiaso nei, 15 o Aperila sa fuafua e amata faaaogā ai le eletise mai ia afi ma lē toe faasoasoaina ai, peita’i talu mai le afiafi ananafi o loo faatalitali le atunuu i Upolu i se faasilasilaga o lea tulaga mai le malosi faaeletise, a o sauni le atunuu i aso mālōlō e faamanatu ai le Eseta o lenei tausaga, ma le faai’uga o le vaiaso umi poo le long weekend.
