E to’a 70 tagata ua faanofoesea nei e i latou ia sa iai le fesootaiga i le alii talavou na sola ese mai le nofoaga sa nofo vaaaia ai ina ua toe foi atu i Samoa i le vaiaso ua mavae ma le isi toatele o le pasese o loo faanofoesea i le taimi nei mo le 3 vaiaso.
O le to’a 70 lea ua aofia ai tagata e to’a 11 o le aiga o lea taulele’a lea na faapea na agai iai i le taeao o le Aso Lulu ina ua ia tuua le nofoaga. I le feiloaiga a Tusitala ma sui o le Komiti o Faalavelave Faafuasei na faailoa ai e le Faatonu Sili o le Soifua Maloloina le afioga Leausa Dr. Take Naseri le tulaga ua iai a latou galuega faatino i le sailia o i latou uma sa iai le fesootaiga ma lea alii talavou.
“O le tulaga la lea ua iai nei o lea ua tele ua toe maua mai nisi tagata sa fesootai iai le tauleale’a lea e 26 tausaga mai Vaitoloa. Sa logo mai i matou e nisi foi o le atunuu ia ma toe faamautu ai ina ua faatalatalanoa le avetaavale sa fealua’i i le taavale laititi lea sa feaveai ai faapea se tasi o le tuaoi o le fale talimalo lea sa faanofoesea ai lea ua aumai ma toe faatalanoa ma aumai se isi faamatalaga i gaioiga uma i le taimi atoa na aluese mai ai i le faanofovaavaaia seia oo i le taimi na toe maua ai”.
Taua foi e Leausa “O le vaaiga la lea e iai na aluese mai loa sa iai le taimi na oo ai i lona aiga i Vaitoloa ia faamaonia mai foi e tuaoi mai le afioaga na oo atu le taulealea i lona aiga i le taeao po lava ae le’i tāina le itula e 8 i le taeao faapena foi ona aluese mai i Vaitoloa, na faafesootai atu foi le Kamupani telefoni o le Vodafone na māua i o latou mea pueata i totonu o le Ofisa sa iai lea alii i totonu o le latou ofisa e taumafai ai pe faiga o se telefoni poo le agai le i le 8:30. Na lipoti mai foi lea e le vaega a le Ah Liki Wholesale sa oo atu foi i lea kamupani e taumafai e tala ai se tupe.
O contacts uma ia afai tatou te fua i le faavae o le taule’ale’a Lea sa alatu mai Niu Sila i le mea o loo tetele ai le faama’i, o ia le na expose, lea na alu atu i le vaalele lea na faanofo vaavaaia o tagata muamua lava la ia ua fesootai iai tagata ia Samoa (close contacts).”
O i latou uma lava na fesootai ma lea Alii i le aso na sola ai lea ua faafesootai ma agai uma atu e faanofoesea mo le saogalemu. Ua faailoa foi e le taitaifono o le Komiti o Faalavelave Faafuasei ua silasila le Loia Sili a le Mālō i le toe iloiloina o faasalaga o le lē usitaia lea o aiaiga o puipuiga o le atunuu mai le faama’i ona o le tulaga na tulai mai i le sola ese o lea alii o se tasi o tagata
faavaitaimi ua toe talu atu i Samoa.
O le faalauiloaina o le suafa ma le ata o le taulealea na ia tuua le nofoaga i Moamoa ua faailoa e le Taitaifono Agafili Shem Leo ina ua fesiligia i lea tulaga e ogaoga tele le tulaga na tulai mai ma e taua tele ai le silafia e tagata.
“This is a matter of national security, ana le release ina le ata lea e lē maua le tele o isi contacts lea na vaaia lea alii ma ua vave ai foi ona faataua sailiiliga a le matagaluega.”
